1989 – Selahêdin Miyalonic û Bêlya Çoli

1989 di, Selahêdin Miyalonic bibi reîsê Bêlya Çolig. Yew serrê pêy Bêlya Çolig hewilya bî binê xo ya newe.

Qat sêr reîs kerdibî loqontê. Xebatoxê Bêlya nim roj şinî ucadê nûn werdinî.

Westê ucay Êli Çölekij bi. Êli waxt vêr zî loqontê şuğulnênî. Dima kewtibî Bêlya, bibi xebatoxê Bêlya, ni semedê ra loqontê xo qefelnabî.

Gurê loqontê zaf zehmetû; yew kes nêşkenû heq ra biyêrû.

Êli reîs ra vûnû:

— Yew merdim mir lazimo. Ez têna nêşkena heq ra biyêrî.

Waxt nim roj. Xebatoxê Bêlya loqontid waxt taştarê yênî. Pê ser taşt wen û xo miyandî qisê kênî. Reîs xebatoxun ra vûnû:

— Şima kes şinasnênî se vacîn, gera heq ni gurê ra biyerû? Ma bigerî wa ityad marî wer poc û.

A hêl Orhan Zuexpayij vûnû:

— Reîs beg, yew Miyalonic şima esto. Namê ey Feyz û. Merdim şima zî kênû. Ma ey bigêr?

Eşnawitiş mi gorê Darêhênî di yew mudet loqontê di xebitiyo. Vanî zaf rind fasliyon û nêhon pocenû. Mi gorê Feyz êşkeno heq ni gurî ra biyêrû.

Reîs ageyrenû Orhan ra vûnû:

— Liya Orhan, Miyalonic çi zunû wêr loqontî pocû? Mi serê nikon. Ez Feyz nigêna uca.

A ruec Orhan Zuexpayij na mesêla dewic reîs, Nureddin Sekmon ra vûnû:

— Xal Nureddin! Xalo, êyr ma sêr Bêlyad muşêrê kerdînî. Yew merdim semedê loqontî Bêlya mar lazimo. Mi reîs ra wa, ma Feyz bigêr, yo zunû wer pocû. Reîs qabul nêkerd.

Reîs mira wa:

— Miyalonic çi zunû nûn pocû?

Nureddin Sekmon zî ew waxt Bêlyad encümen bi.

Nureddin Orhan ra vûnû:

— Orhan, na qalê reîs ser to reîs ra tewe nêwa?

Orhan vûnû:

— Xalo, vullay mi tewe niva.

Nureddin vûnû:

— Ti nêşkê vacî? Huma xer xo bidû to. Miyalonic qêy eşkenû reîsib û qey nêşkenû wer pocû?

Mersele reîs û Feyz Miyalonic in qeydê bî. Mi ard zuwan ser û nişt.

16.02.2013

Irfan Kaya