Şex Şerif û nimac Xelonicun

Şeyx Şerîf Kelaxsi ra lacê Şeyx Mistefa Efendî bî.

Dayê Şeyx Şerîf Xeylon Gowderî ra bî.

Şeyx Şerîf, verê Kiyamê Şeyx Said, yew roc şinû Xeylon. Watişan gore, hettûn a roc Xeyloniçûn zêde kes nêzonêni nimac çi çinêyo, çi semedra yenû kerdiş.

Efendî zî vaiz dûn, Xeyloniçûn xo vûnê:

— Nî qeydê nêbeno, nimac bikerîn. Kam nimac bikero, hetê Homay di cê eyn esto. Kam nêkero, a dinyaya de hisab pîl dano Homay.

Xeyloniç zî vanê:

— Efendî, ti Şeyx de ma ra vac, nimac sênî benû, ma bikêr?

Şeyx qayilû Xeyloniçûn ê bimusî nimac bikêrî.

Şeyx onênû derheqê şertê Îslamî de Xeyloniç zaf çi nêzonê. Wî zî zaf nişto Xeylon xo ser.

Şeyx vano:

— Şima ser sibayî, reura warzênî. Hema şefeq neveciyo, şima di farz û di rek'at nimac kênî. Dima, waxtag tij hetê nimroj tam yena wertê ezmên, ew waxt zî şima çehar farz û çehar zî sünnet perû, piya heşt rek'at nimac kênî. Hetê şun waxtag newe benû tari, şima honc di farz û di sünnet perû, piya çehar rek'at nimac bikerî, besû.

Ina yena zunayiş: Şeyx Xeylon xo rocî hiri waxt nimac kerdo raşt.

Züvêr ra mallê Saf eşnawenû Şeyx şertê nimac semedê Xeyloniçûn kerdû hiri waxt, nê sera hêrs benû.

Rocêk Şeyx yenû Züvêr, mall ra şinû Şeyx het û vano:

— Liya, Efendî, ti qet Homay ra nêtersênî? Şertê nimac rocî ponc waxto. Ti sênî eşkênî Xeyloniçûn ra vacê rocî hiri rê nimac bikerîn?

Şeyx onênû mall zaf hêrs biyû. Ageyrenû mall û vano:

— Malla, qey ti mira hêrs biy? Ezî zano şertê nimac poncî. Mi zor hiri waxt Xeyloniçûn ra dayî qebulkerdiş. Ti camêrd se, ti şuê dîna waxt ser nêker, ponc waxt.

Rehmê Homay hurd hemîn zi ser bo.

Hurd hemê zî zunayê ma bî û hurd hemê zî hetê millêtê ma ra zaf omênî hêskerdiş.

Irfan KAYA