Dat Mist

Dat Mist dewe Pîran, Salorî'd cuvîyenî

1980 di ez tayîn bîya Salorî. Ez û Dat Mist ma bîy şinasî û dostê yewbînan.

Dat Mist di cênî yi estibî. Cênîya pêyîn hema con'ib, Dat Mist ra 30 ser qij bî. Cênîya pêyîn ra 5 gedê Dat estibî. Vatê Dat Mist gorê en tay 5 yan 6 gedê yi merdibî.

Rahar dew kiştê baxçê Dat Mist ra viyertînî. Dat Mist zerrê baxçî'd yew Hoz'a qicik viraştibî. Pê baçxê xwi aw dênî. Vatiş Dat Mist gorê çêrrê kyê'd sarê xwu nişitînî, tim Hozê baxçî'd sarê xwu şitînî.

Rocek nimac sibê'dî ez reura varişta, wî ez şinî Pîran. Ew waxt tomafilê dewê ma çinêbî. Ma mecbur peyatî şînî serê rahar Pîran, ucad hema ma niştînî tomafil pê şînî Pîran.

A roc ez ama kiştê baxçî, zerrê baxçî ra yew veng amê goşanê mi. Mi sarê xwu çarna hetê baxçîya, ez çi bivînî?

Yew merdim wertê zimiston xwu kerdû zit mîyanê awk di vano:

“Eûzübillahî mine'ş-şeytanî racîm!”

û xwu cenen awkê Hoz'ir.

Ez şaş bîya. Xwebxwe fikriyaya: “In merdim sarê xo pernaw, wertê zimiston pê awa serdin desmac xwu pîl geno?”

Mi veng da:

— Gelo ti kam çi kesî yê veng biki?

Miyanê Hoz ra Dat Mist sarê xwu kerd berz, va:

— Ez a hoca.

Mi va:

— Dat Mist, kêye'd aw çinya ti îtyad desmac gên?

Dat Mist va:

— Ez çerrê kyê'd desmac pîl nigena. Ez imnon û zimiston desmac xwî tim baxçê'd gena.

Hên in gurê ca verd?

In hêdîsê ra pê yewna roc bi. Ez şîya dewê Dimlî. Ucad Sağlik Ocağı estibî. Dat Mist û cênê yi pîya uca dibî.

Ez persawa:

— Dat Mist, xêra şima, îtyadê?

Dat Mist wa:

— Hoca, cenek pizera niwêşa mi arda îtya. Doxtor vano gede ver şiyû. Ez gera şêrî Pîran ra darû biyarî.

A roc ma pîya şî Pîran.

Mi va Dat Mist:

— Serê to zaf pîl, hên in gurê ca verd?

Qalê mi weşê Dat Mist nêşîbî.

Dat Mist wa:

— Hoca, hema kuvvêt mi ho cado. O gurê hema mi destra yenû. Çerrê bazar ê gurî bîyû?

Qalê Dat Mist ser, ez zaf huyawa.

Mi wa:

— Dat Mist, vullay bazar ê gurî çinû. La belê bazarê gedê nê ardîş esto. Homa emir derg bid honimê to, vahar ponc gedan'a. Ti biwazî, hên gedê nibênî.

Vatê mi kot Dat Mist sarê.

Wa:

— O gurê çi qedê beno?

Mi va:

— Binê perê to şîn, la belê to û honim piya şima gedûn ra xelesîyên. Şima gera piya şêr doxtor cênon.

— Şıma vanî ma hên qayil nîy, gêde ma bibî.

Doxtor ew waxt yan darû dûn şima, yan zî sobina hacêt kên honima, hîn gedê cîr nibênî.

Dat Mist agêyra mira va:

— Ti eşkênî mad biyêrî doxtor?

Mi va:

— Beno, Dat Mist.

Wa honim weşib, badî di aşman ma pîya şînî doxtor.

Badî di aşman Dat Mist da piro şî Edena xebat. Ezî tayîn bîya, şîya sukê Zonguldak. Mi hên Dat Mist'ra xeber nê girot.

Irfan Kaya

Darû: İlaç
Hoz: Havuz
Gedê: Qij, put yan zî minal (çocuk)