Mal, millet, min û to zê cîyo!

Yeno mi vîr, nêzdîkî 30 serrî verî, cuwaver lacê Mehmed Zekî Efendî, Şex Feyzullah Efendî, şî bi Tarbasûn û Çilkonî.

Dewîcu, sêr cuyîn de, 10 têllîs çeltuk zika dabî ci. Şex ma 9 têllîs çeltuk sêr cuyîn de roşen duno, vahar çeltuk perûn xo geno. Yew têllîs zî ardi bî Çolig, dikanê zomay ma de nêbî ro.

Vaştî bî:
“Bero fabrikad riz veco û semedê wêr, bero kê xo.”

Rehmeta babî mi şino dikanê zomay. Onêno yew têllîsê çeltuk pê berî dî, vinertêya.

Zomayra perseno:

— Na têllîsê çeltuk ê kama?

Zoma vano:

— A têllîsê Şex Feyzullaya.

Vendenû rehmeta Êlî, hamalê Sivonîciyê, beno. Vano:

— Êlo, na têllîsê çeltuk ti bên çarşuyê cêr fabrikê Arîf varê merg. Yo riz vecenû, ti bên kê ma.

Êl, hamalê çuvalê çeltuk geno xo ser û kift beno fabrikad. Hetî yerîya riz veciyeno, Êl çuvalê riz geno û beno kê ma.

Rocê bîn Şex yeno dikanê zomay. Onêno têllîsê çeltuk cê xo de nîyo.

Zomayra vano:

— Çeltukê mi ho çado?

Zoma vano:

— Vullay, vistorê mi amey dikan, persê çeltuk kerd. Mi va: “Ê Şex Feyzullaya.” Goştarîyê mi nêkerd. Venda Êl Sivonîciyê amey, girot û berd fabrikad, riz veciyê û berd kê xo.

A hêl rehmeta babî mi kueno zerê dikan.

Şex vano:

— Keko, qêy to têllîsê çeltukê mi berda?

— A zika bî dewîcu, da bî mi!

Babî mi Sex ra vano:

— Çeltuk çara bîyê ê to?

— Ê dewîcuno!

Zomay, bê qesem, beno hakemê meselê:

— Mal, devîcu min û to zê cîyo! Vullay ez tora hîna feqiro. Zika torî şîna û qey merdim feqir zê mîr nêşina?

Şex venge xo nêkeno. Rehmeta babî mi veciyeno teber û şino.

Şex zomayra vano:

— Ti êyr taşt dun mi!

Zoma vano:

— Tamam, Efendî!

Şex zomay geno û ben Loqontê. Çahar tene kebab xo vênû.

A hêl rehmeta Şex Mehyeddîn Kelaxsî ucara vîyereno. Vendenû êyd zî.

Rehmeta Mehyeddîn vano:

— Feyzullah, in êhmaq to çad diyu to ard Loqontê?

Feyzullah Efendî veng xo nêkeno.

Yo zî 3 hiri kebabu xo venû, varzêni wi. Şinî yew heta. Zoma zî şino dikan.

Hetî yerîya ez şîya dikanê zomay. Zoma ho qerqiliyeno.

Mi va:

— Sebîyo?

Va:

— va hal meselê! Baykê to in qedeya! Yo riz berd kîyê şima, wênî! Cirmê rizê şima zî ez dano!

Vullay, mal, millet, min û to zê cîyo! Çeltukê Şex şî, zika rehmeta babî ma mend, perê kebabê Şex zî zoma dawo!

Homa rehmê xo hîri hemin zî bikero.

Eyr, yî dinyad nî la, belê ma rê in meselê wes verdê ma; hê meselon yîn ser xebêr danî.

Irfan Kaya