Zumrî Êmerûn

Zumrî Êmerûn, Çewlig di yew merdimo belûkerde bi.

Pîle keyeyî Êmerûn bi. Yew merdimo zaf aqıl bı.

La belê leng bi. Pê çunqalê geyrenî.

Zumrî Êmerûn waharî mal û milk bi.

Deştê Çewlig di zaf mal û erdê yi estibî. Yew kisimê êrdê ey zi Xeydê Çewlîg di bî.

Xeyd ra Meh Êgit zaf teq fineno zerê Zumrî Êmerûn.

Zumrî wazeno Mehî biyar fasal û ey biqu.

Labelê Zumrî leng o, nêşkeno vazdo;

Mehî Êgit zi linganê xo zaf pîto.

Zey Argoş î remeno.

No ridra Zumrî nêşkeno Meh têpişo.

Zumrî xo bi xo fıkriyeno ke senî Meh biyar fasal û biqû.

Yew rojê Zumrî dûno ra şino Xeyd. Zimistan o, vewra ewile newê kewta êrd. Zumrî mîyanê hêgayî xo di geyreno.

Ewnîyeno ke Kutîkan û Luyan vewr serdê kay kerdo.

Hêga di her ca rêçê inan eysena.

O cad xo bi xo fıkriyeno ke encax ewro eşkeno Mehî bîyarû fasal.

Pawey Mehi vindeno.

Mehî Êgit zi her rojê yew sitîlî mastî beno Çarşûye Çewlig di roşeno.

O pê peranê mastî hacê xo û keyeyî xo vîneno.

Zumrî vîneno ke sitîlê mastî Mehî Êgitî dest do.

Xo layê Xeyd ra erziyeno vewer, hêti Çewligî ya şino.

Zumrî pilonê xo vıraşta.

O xo bi xo vûno:
— Meho, ti kewtî dûm, xelasî to na rey mi dest ra çîna!

Zumrî veng dano, vano:
— Meho!

Hê bîye mi het.

Yew rêç ita da geyrawa mi, taway tira fahm nêkerd.

Tî hê biewni, tîra gelo rêçê Luye ya yan rêçê Verg ya?

Hayê Mehî Êgit pilonê Zumrî ra çîna.

O saf saf şino Zumrî het.

Zumrî vuno:
— Meho, na rêç, rêçê çinê ya?

Meh Êgit beno çewt, ewnîyeno rêç ra.

Hema fekê xo a nêkerdo, Zumrî xo erzeno ey ser û pê çunqalê xo Meh kuweno.

Sarê Mehî şikneno, sêre Mehî ra guên yena. Meh mecbûr beno, tepîya ageyreno û şino keyeyî xo.

Keyfê Zumrî zaf yeno ca. O xo bi xo vûno:

— Axir mi peynî di Meh ard fasal û zerê xo kerd rehet.

Ez hin bimirî zi xem mi nîyo.

İrfan KAYA